Penza ka shënuar fitore ndaj Bashkimit si mi mysafire me rezultat 68:82 (27:25, 18:26, 10:18, 13:13), në gjysmëfinalen e dytë të “Play-off”-it. Tashmë ndeshja e tretë do të zhvillohet në Pejë, ku do të përcaktohet se kush do të kualifikohet në finalen e Superligës së Femrave.

Çereku i parë i ndeshjes ishte i barabartë, ku të dy skuadrat epërsinë më të lartë e kishin pesë pikë, ndërsa rezultati shpesh herë u barazua në këtë pjesë, që përfundoi 27:25. Edhe periudha e dytë e sfidës ishte e barabartë, ku dy minuta para fundit të pjesës së parë, rezultati ishte 45:45, por gjashtë pikë radhazi nga pejanet bënë që pjesa e parë të përfundojë me shifrat 45:51.

Dallimi i madh u bë në periodën e tretë, ku skuadra pejane ishte më e mirë dhe u shkëput deri në 16 pikë, 53:69, sa ishte epërsia më e lartë në ndeshje, kurse rezultati në semafor pas 30 minutash ishte 55:69. Në dhjetë minutat e fundit u zhvillua lojë e barabartë dhe kjo mjaftoi që Penza të fitojë 68:82.

Te Bashkimi u dalluan Era Shatri me 11 pikë e 14 kërcime dhe Poole Porsche me 19 pikë, kurse te Penza u dalluan Rael Whitsitt me 23 pikë e 16 kërcime dhe Narlyn Mosquera me 17 pikë e katër kërcime./Arbresh.info